ravikant tupkar shetkari andolan
मुंबई आंदोलनाच्या तयारीवर पाणी फेरण्याचा प्रयत्न?
रविकांत तुपकर यांनी जाहीर केले होते की, ते मुंबईत अरबी समुद्रात सातबारे बुडवून सरकारचे लक्ष वेधणार आहेत. याशिवाय सोयाबीन आणि कापूसही समुद्रात फेकून शेतकऱ्यांची दयनीय अवस्था सरकारसमोर आणणार आहेत. मात्र, हे आंदोलन होऊ नये म्हणून पोलिसांनी सकाळीच मोठ्या प्रमाणावर कारवाई सुरू केली आहे.
आज सकाळी बुलडाणा जिल्ह्यातील शेलगाव जहागीर येथे पोलिसांनी तुपकरांचे खंदे समर्थक विनायक सरनाईक यांना झोपेतून उठवून ताब्यात घेतले. तसेच, जिल्ह्यातील अनेक प्रमुख कार्यकर्त्यांना अटक करण्याची प्रक्रिया सुरू आहे.
महाराष्ट्रातील शेतकऱ्यांच्या न्याय्य मागण्यांसाठी नेहमी आक्रमक भूमिका घेणारे शेतकरी नेते रविकांत तुपकर यांनी सरसकट कर्जमाफी आणि अन्य मागण्यांसाठी मुंबईत आंदोलनाचा इशारा दिला होता. त्यानुसार आज, १८ मार्च रोजी बुलडाण्यातून हजारो शेतकऱ्यांसह ते मुंबईकडे रवाना होणार होते. मात्र, हे आंदोलन रोखण्यासाठी पोलिसांनी मोठी मोहीम राबवली असून अनेक कार्यकर्त्यांची धरपकड सुरू आहे.
पोलिसांची धडक कारवाई – तुपकर संतप्त!
पोलिसांच्या या कारवाईवर रविकांत तुपकर यांनी तीव्र नाराजी व्यक्त केली आहे. ते म्हणाले,
“आम्ही काही दरोडेखोर नाही! आम्ही आमच्या हक्कांसाठी लढतोय! आम्हाला रोखायचा प्रयत्न केलात तर गंभीर परिणाम भोगावे लागतील. कोणत्याही परिस्थितीत आम्ही मुंबई गाठणारच!”
त्यांच्या या वक्तव्यावरून स्पष्ट आहे की, पोलिसांनी कितीही अडथळे आणले तरी आंदोलन थांबणार नाही.
तुपकर यांच्या घरी पोलिसांचा छापा!
या आंदोलनावर आक्रमक कारवाई करताना पोलिसांनी रविकांत तुपकर यांच्या घरावरही छापा टाकला. मात्र, ते घरी नसल्याने पोलिसांनी त्यांच्या पत्नी अॅड. शर्वरी तुपकर यांना ताब्यात घेण्याची शक्यता आहे.
शहीद शेतकऱ्यांना अभिवादन करून पुढे कूच
रविकांत तुपकर यांनी आंदोलनापूर्वी शिवणी आरमाळ येथे शहीद शेतकरी कैलास नागरे यांना अभिवादन करण्याचा निर्णय घेतला आहे. त्यानंतर, बुलडाणा येथील क्रांतिकारी हेल्पलाइन सेंटरमधून सकाळी १० वाजता हजारो शेतकरी मुंबईच्या दिशेने रवाना होणार आहेत.
सरकारला आव्हान – शेतकऱ्यांचा निर्धार!
या संपूर्ण घटनेतून सरकार आणि पोलिस प्रशासन आंदोलन रोखण्यासाठी पूर्ण ताकद लावत असल्याचे दिसत आहे. मात्र, रविकांत तुपकर आणि त्यांच्या कार्यकर्त्यांचा निर्धार अढळ आहे. आता हे आंदोलन कोणत्या वळणावर जाईल, याकडे संपूर्ण महाराष्ट्राचे लक्ष लागले आहे.
