सध्याच्या राजकीय घडामोडी पाहता भाजपाच्या केंद्रीय नेतृत्वाकडून फडणवीसांचं खच्चीकरण केल्याचा गंभीर आरोप अखिल भारतीय ब्राह्मण महासंघाने केलाय. ब्राह्मण महासंघाचे अध्यक्ष डॉ. गोविंद कुलकर्णी यांनी याबाबत निवेदन जारी करत आपली भूमिका स्पष्ट केली.
ब्राह्मण महासंघाचा आरोप
डॉ. गोविंद कुलकर्णी म्हणाले, “भाजप पक्षात ब्राह्मणांना खच्चीकरण झाल्यासारखे वाटत आहे. पंतप्रधान पदाच्या शर्यतीतून मधून बाजूला करण्यासाठी नितीन गडकरी यांचं खच्चीकरण करण्यात आलं. त्यानंतर मागील काही वर्षांपासून देवेंद्र फडणवीस यांच्यात मार्गात अडथळे आणण्यासाठी बहुमतापेक्षा अधिक संख्येने युतीचे आमदार निवडून आणल्यानंतरही भाजपातील पक्ष श्रेष्ठींकडून त्यांना मुख्यमंत्रीपदी बसू दिलं गेल नाही. पद्धतशीरपणे देवेंद्र फडणवीस यांना सत्तेपासून दूर ठेवलं गेलं.”
“आत्ता फडणवीस यांनी आपल्या राजकीय अनुभवाद्वारे पुन्हा भाजपाला सत्ता मिळवून दिली. त्यानंतर एकनाथ शिंदे यांना मुख्यमंत्री बनविण्याचे निर्देशन दिले. देवेंद्र फडणवीस यांनी मोठ्या मनाने मुख्यमंत्रीपदाचा त्याग करून कार्यकर्ता म्हणून काम करण्याचे ठरविले. त्यानंतर भाजपातील वरिष्ठ नेतृत्वाने बळजबरीने उपमुख्यमंत्रीपद स्वीकारण्यासाठी आग्रह धरला. देवेंद्र फडणवीस यांचं अशाच पद्धतीने खच्चीकरण करण्यात आलं,” असा आरोप गोविंद कुलकर्णी यांनी केला.
“भाजपामध्ये एकानंतर एक ब्राह्मण नेतृत्वाचं खच्चीकरण करण्याचे एक सुनियोजित कारस्थान चाललं आहे. या घटनेचा अखिल भारतीय ब्राह्मण महासंघ तीव्र शब्दात निषेध करीत आहे,” असंही कुलकर्णी यांनी आपल्या निवेदनात नमूद केलं.