“तुम्ही बापाचे विचार विकले, बापालाच विकण्याचा…”, एकनाथ शिंदेंचा उद्धव ठाकरेंवर हल्लाबोल; म्हणाले…

एकनाथा शिंदे यांनी बंड केल्यानंतर शिवसेना पक्ष प्रमुख उद्धव ठाकरे यांनी नेहमी शिंदे यांच्यावर बाप पळवणारी टोळी असे म्हणत टीका केली आहे. या टीकेला मुख्यमंत्री एकनाथ शिंदे यांनी दसरा मेळाव्यात उत्तर दिलं. आम्हाला म्हणतात बाप चोरणारी टोळी निर्माण झालीय. तुम्ही तर बापाचेच विचार विकले, तुम्ही तर बापालाच विकण्याचा प्रयत्न केला असा पटलवार एकनाथ शिंदे यांनी उद्धव ठाकरेंवर केला.

बीकेसी येथील MMRDA मैदानावर शिंदे गटाचा दसरा मेळावा पार पडला. यावेळी एकनाथ शिंदे यांनी उद्धव ठाकरेंवर निशाणा साधला. सहन करण्याची एक मर्यादा असते. सत्तेसाठी तुम्ही हिंदुत्वाची तिलांजली दिली, मग खरे गद्दार कोण? जनतेला समजलं आहे. त्यामुळे जनता आमच्याबरोबर आहे असे शिंदे म्हणाले. बाळासाहेबांच्या विचारांना तिलांजली देऊन तुम्ही जे काही पाप केलं, ते शिवसैनिक कधीच विसरणार नाही. त्यामुळे महाराष्ट्रातील जनताही तुम्हाला माफ करणार नाही. तुम्ही वैचारिक व्यभिचार केला आहे. तुम्ही जे पाप केल आहे, त्यासाठी आधी बाळासाहेबांच्या शिवतीर्थावरील समाधीवर गुडघे टेका आणि माफी मागा, मग आमच्यावर बोला असे आव्हान देखील एकनाथ शिंदे यांनी उद्धव ठाकरेंना दिले आहे.