‘वेदांता’ ग्रुप व तैवॉन येथील ‘फॉक्सकॉन’ या कंपनीचा जॉईन्ट व्हेंचर असणारा महत्त्वाचा प्रोजेक्ट गुजरातल गेला. राज्यात सत्ताबदल झाल्यानंतर महाराष्ट्रात येणारा प्रकल्प गुजरातला गेलाच कसा? असा सवाल महाविकास आघाडीचे नेते करत आहेत. त्याला मुख्यमंत्री एकनाथ शिंदे यांनी स्पष्टीकरण दिलंय. ‘या प्रकल्पासाठी गेल्या दोन वर्षात जो रिस्पॉन्स मिळायला हवा होता तो कमी पडला असावा’, असं म्हणत फॉक्सकॉन प्रकल्प गुजरातला जाण्याला तत्कालिन मुख्यमंत्री उद्धव ठाकरेच जबाबदार आहेत अशी अप्रत्यक्ष टीका शिंदे यांनी केलीय.
महाराष्ट्रात येणारा प्रकल्प गुजरातला गेलाच कसा? विरोधकांच्या या प्रश्नाला उत्तर देताना एकनाथ शिंदे म्हणाले, ‘आमचं सरकार येऊन दोनच महिने झाले आहेत. मी मुख्यमंत्री झाल्यानंतर वेदांताचे मालक अनिल अग्रवाल आणि फॉक्सकॉनसोबत एक बैठक घेतली. या बैठकीला उपमुख्यमंत्री देवेंद्र फडणवीस देखील उपस्थित होते. या बैठकीत सरकारकडून ज्या काही सवलती देणे शक्य आहे, त्या सर्व दिल्या जातील, असं मी त्यांना सांगितलं. पुण्यातील तळेगावजवळील ११०० एकर जमीन तसेच ३० ते ३५ हजार कोटींच्या सवलतीसह अनुदान तसेच अन्य बाबी सरकारच्यावतीने ऑफरही करण्यात आल्या होत्या. म्हणजेच सरकार म्हणून आम्ही कुठेही कमी पडलो नाही. तर या प्रकल्पासाठी गेल्या दोन वर्षात जो रिस्पॉन्स मिळायला हवा होता, तो कमी पडला असावा असंही शिंदेंनी स्पष्टे केलं.