शिवसेनेतील दोन्ही गट म्हणजे उद्धव ठाकरे आणि शिंदे गट दोघेही दसरा मेळावा घेणार आहेत. आम्हीच खरी शिवसेना हे स्पष्ट करण्याची खूप मोठी संधी दोघांना मिळालेली आहे. शिंदे गटाचा हा पहिला दसरा मेळावा असून बीकेसी मैदानावर जय्यत तयारी सुरु झालेली आहे. दसरा मेळाव्यानिमित्त शिंदे गट राज्यात शक्तीप्रदर्शन करणार आहे. प्रत्येक आमदारावर यासाठी जबाबदारी टाकण्यात आली असून लाखोंच्या संख्येने जनसमुदाय जमा होईल असे शिंदे गटाकडून सांगण्यात येते आहे.
राज्याच्या विविध भागातून कार्यकर्ते येणार असून मोठ्या प्रमाणावर खाजगी चार चाकी गाड्यांचे बुकिंग होत आहे. एसटी बसेसचेही ग्रुप बुकिंग करण्यासाठी आमदार, पदाधिकारी सज्ज झालेले आहेत. चार हजारांहून अधिक एसटी गाड्यांचे बुकिंग करण्याचे नियोजन शिंदे गटाकडून करण्यात आलंय असे सांगितले जातेय.
सभेसाठी येणाऱ्या वाहनांच्या पार्किंगसाठी आसपासची दहा मैदानं बुक केलेली आहेत. स्वतः मुख्यमंत्री एकनाथ शिंदे यांनी माहिती दिली. बुधवारी सायंकाळी शिंदे गटाच्या प्रमुख नेत्यांची मुंबईच्या गरवारे क्लबमध्ये एकनाथ शिंदेंच्या उपस्थितीत दसरा मेळाव्यासंदर्भात बैठक पार पडली. या बैठकीत मेळाव्यासाठी येणाऱ्या व्यवस्थेचा आढावा घेण्यात आला होता. दसरा मेळावा उत्साहात साजरा होणार असून अनेक जण आपल्यासोबत येणार आहेत त्यांचा प्रवेश दसरा मेळाव्याला होईल. कार्यकर्त्यांच्या अगदी चोख व्यवस्था केली जाणार आहे त्याकडे विशेष लक्ष दिलं जाणार असेही मुख्यमंत्री शिंदे यांनी सांगितले आहे.
या मेळाव्याच्या पार्श्वभूमीवर शिंदे गटाचे आमदार भरत गोगावले आणि प्रवक्त्या शितल म्हात्रे या मैदानाची आणि तयारीची पाहणी करत असतात. शिवसैनिक मोठ्या प्रमाणात याठिकाणी येणार असून त्यांची गैरसोय होणार नाही. जवळपास तीन लाख शिवसैनिक मेळाव्याला येतील असं आमदार भरत गोगावले म्हणालेत.