स्वारगेट बलात्कार प्रकरण : तब्बल 70 तास लपलेला Dattatray Gade Arrested

पुणे शहरातील गजबजलेल्या स्वारगेट बस स्थानकात घडलेल्या अत्याचाराच्या घटनेने संपूर्ण शहर हादरलं होतं. शिवशाही बसमध्ये एका तरुणीवर बलात्कार करून फरार झालेल्या Dattatray Gade या नराधमाला तब्बल 70 तासांच्या शोध मोहिमेनंतर पोलिसांनी अटक केली. या घटनेनंतर संपूर्ण पोलीस दल सतर्क होत आरोपीच्या शोधासाठी 500 पोलिसांचे पथक, ड्रोन आणि डॉग स्क्वॉड तैनात करण्यात आले होते. शेवटी, गावकऱ्यांच्या मदतीने त्याला पकडण्यात यश आलं.

स्वारगेट एसटी स्टँडवर रोज सावज शोधायचा

पोलिसांच्या प्राथमिक चौकशीत आरोपीच्या हालचालींबाबत अनेक धक्कादायक बाबी समोर आल्या आहेत. दत्ता गाडे हा रोज रात्री पुण्यातील स्वारगेट, शिवाजीनगर आणि शिरूर बस स्थानकांवर महिला सावज शोधण्यासाठी फिरायचा. दिवसा गावी लपून, रात्री बस स्थानकांवर फिरून एकट्या महिला किंवा मुलींचा मागोवा घ्यायचा.

पोलिसांसमोर कारमध्येच कबुली

गावात लपून बसलेल्या गाडेला शुक्रवारी शिरूर तालुक्यातील गुनाट गावातून पोलिसांनी अटक केली. पुण्याकडे आणताना कारमध्येच पोलिसांनी त्याच्याकडे चौकशी सुरू केली आणि यावेळी तो बोलू लागला. त्याने पूर्वीही काही महिलांना अशाच प्रकारे फसवल्याची शक्यता वर्तवली जात आहे.

अटक मोहिमेत ड्रोन आणि श्वान पथकाचा वापर

पोलिसांनी या आरोपीचा माग काढण्यासाठी ड्रोन, श्वान पथक आणि तांत्रिक विश्लेषणाचा आधार घेतला. तब्बल 70 तास तो पोलिसांपासून लपून राहिला होता. शेवटी, तो एका नातेवाईकाच्या घरी पाणी मागण्यासाठी गेला असताना त्याने गुन्ह्याची कबुली दिली. पोलिसांनी लगेच त्या परिसरात शोधमोहीम राबवत त्याला बेड्या ठोकल्या.