उपमुख्यमंत्री देवेंद्र फडणवीस यांच्या पत्नी अमृता फडणवीस नेहमीच चर्चेत असतात. सोशल मिडीयावर अमृता या खूप अॅक्टिव्ह असतात. त्यांची एक गायिका म्हणून देखील स्वतंत्र ओळख आहे. इतकंच नव्हे तर अमृता यांची गाणी सोशल मीडिया आणि युट्यूबवर तुफान व्हायरल होताना दिसतात. त्यांच्या गाण्याला मोठ्या प्रमाणात कमेंट्स देखील येतात. आता पुन्हा एकदा अमृता एका नव्या गाण्यासह प्रेक्षकांच्या भेटीला आल्या आहेत.
अमृता फडणवीस यांनी त्यांच्या इन्स्टाग्राम अकाऊंटद्वारे आपल्या नव्या गाण्याची घोषणा केली होती. आज हे गाणं सारेगम या युट्यूब चॅनलवर प्रदर्शित झालं आहे. या गाण्याचं नाव आहे, ‘वो तेरे प्यार का गम’. ‘माय लव्ह’ या हिंदी चित्रपटातील हे गाणं आहे. या गाण्याची पुनर्निमिती करताना अमृता यांनी आपला आवाज दिला आहे. ‘वो तेरे प्यार का गम’ हे जुन्या गाण्याचंच रिक्रिएट वर्जन आहे.
‘वो तेरे प्यार का गम’ या गाण्याच्या रिक्रिएट वर्जनचे बोल अमृता फडणवीस यांचे आहेत. तसेच या गाण्याच्या व्हिडीओमध्ये त्या स्वतः हे गाणं गाताना दिसत आहेत. अमृता यांनी या गाण्याच्या व्हिडीओमध्ये काळ्या रंगाचा वेस्टर्न ड्रेस परिधान केला असल्याचं दिसत आहे. हे नवं गाणं ऐकता काहींनी त्यांच्या आवाजाचं कौतुक केलं आहे.या गाण्याला ५ तासांमध्येच १० लाखांपेक्षा अधिक व्ह्युज मिळाले आहेत. ‘माय लव्ह’ या चित्रपटामधील हे गाणं याआधी आनंद बक्षी यांनी लिहिलं होतं. मूळ गाण्याला दिवंगत गायक मुकेश यांनी आपलं आवाज दिला होता. हे गाणं पुन्हा गाताना अमृता यांनी जुन्या गाण्याच्या स्मृती जागृत केल्या.