केंद्रीय निवडणूक आयोगाकडे शिवसेना पक्षप्रमुख उद्धव ठाकरे यांनी लेखी उत्तर सादर केले आहे. अंधेरी पोटनिवडणुकीत एकनाथ शिंदेंच्या गटाचा उमेदवार नाही, मग धनुष्यबाण चिन्ह का मागितलं जातंय? असा सवाल ठाकरेंतर्फे विचारण्यात आलेला आहे. शिवसेनेच्या रमेश लटके यांच्या निधनानंतर अंधेरी पूर्व पोटनिवडणुकी होत आहे त्यात ठाकरे गटाकडून शिंदेंवर शरसंधान साधण्यात आलेले आहे. शिंदे गटाने हक्काची जागा भाजपसाठी सोडलेली आहे. त्यांनी स्वतःचा उमेदवारही रिंगणात उतरवलेला नाही, मग आता धनुष्यबाण कशाला हवाय? असा सवाल ठाकरेंतर्फे विचारण्यात आलेला आहे.
मुख्यमंत्री एकनाथ शिंदे यांनी धनुष्यबाण निवडणूक चिन्हावर त्वरीत सुनावणी घेण्याची विनंती आयोगाला केली होती. मात्र जोपर्यंत सर्व कागदपत्रं सादर होत नाहीत, तोपर्यंत सुनावणी घेण्याची घाई करु नये अशी विनंती उद्धव ठाकरे गटातर्फे करण्यात आली होती. दरम्यान भाजपला फायदा व्हावा म्हणून शिंदेंनी निवडणूक आयोगाला पत्र पाठवले असा घणाघातही ठाकरेंकडून करण्यात आलेला आहे.
एकनाथ शिंदे यांनी स्वतःला मुख्य नेता पदावर नेमलेले आहे पण असे कोणतेही पद शिवसेनेच्या घटनेत नाही. शिवाय त्यांनी पक्षप्रमुख पदाला चॅलेंज केलेलं नाही, त्यामुळे चिन्हाबाबतचा दावा पक्षप्रमुखांच्या परवानगीविना होऊ शकत नाही, असं ठाकरेंचे म्हणणे आहे. अंधेरी पोटनिवडणुकीमध्ये शिंदेंचा उमेदवार नसल्याने स्थिती जैसे थे ठेवायला हरकत नाही. म्हणजेच अंतिम निर्णय होईपर्यंत धनुष्यबाण आमच्याकडे राहावे, आमच्या चिन्हाचा गैरवापर होऊ नये असेही ठाकरे गटातर्फे सांगण्यात आलेले आहे.
निवडणूक आयोगाची टीम आमची तयारी पाहू शकते. अडीच लाख पदाधिकारी आणि १० लाख प्राथमिक सदस्य यांचं शपथपत्र दिल्लीत आमच्याकडे तयार आहे. केवळ विहित नमुन्यांमध्ये कागदपत्र सादर करण्यासाठी चार आठवड्यांचा वेळ मिळावा अशी मागणीसुद्धा ठाकरे गटातर्फे निवडणूक आयोगाला करण्यात आलेली आहे.