अभिनेत्री वनिता खरात सध्या लोकप्रियतेच्या शिखरावर आहे. ‘महाराष्ट्राची हास्यजत्रा’ कार्यक्रमामुळे ती नावारुपाला आली. पण त्याचबरोबरीने मराठीसह हिंदी चित्रपटामध्ये काम करत एक उत्तम अभिनेत्री म्हणून तिने स्वतःला सिद्ध केलं आहे.
वनिताने फेब्रुवारी महिन्यात सुमित लोंढेशी लग्न केलं. तर लग्नानंतरचा हा तिचा पहिलाच गुढीपाडवा आहे. त्यामुळे हा गुढीपाडवा तिच्यासाठी नक्कीच खास आहे. या गुढीपाडव्याच्या निमित्ताने तिने खास संकल्प केला आहे.
येणाऱ्या वर्षात मला खूप काम करायचंय. खास करून खूप झाडं लावायची आहेत. नवीन वर्षात माझा एक नवीन चित्रपट येणार आहे. त्याची माहिती मी सोशल मीडियावरून प्रेक्षकांना देईनच आणि त्याचसोबत एक नवीन नाटक सुद्धा करायचा माझा विचार आहे असे वनिताने एका वृत्तपत्राला दिलेल्या मुलाखतीत सांगितले.
दरम्यान वनिता खरात लवकरच रोहित शेट्टीच्या पहिल्यावहिल्या मराठी चित्रपटामध्ये झळकणार आहे. ‘स्कूल, कॉलेज आणि लाइफ’ असं या चित्रपटाचं नाव असून नुकताच या चित्रपटाचा ट्रेलर प्रदर्शित झाला आहे त्यात वनिताचीही झलक दिसलीय.