शिंदे गटातील एका आमदाराची आमदारकी धोक्यात आलेली आहे. त्या आमदार आहेत नंदुरबारच्या लता सोनावणे ! जात पडताळणी समितीने जात प्रमाणपत्र अवैध ठरविल्याप्रकरणी नुकत्याच शिंदे गटात सहभागी झालेल्या आमदार लता सोनवणे यांनी हायकोर्टात याचिका दाखल केली होती. हायकोर्टाने ही याचिका फेटाळून लावल्याने आमदार लता सोनवणे यांनी सुप्रीम कोर्टात धाव घेतलीय. सुप्रीम कोर्टात या प्रकरणी सुनावणी झाली. दरम्यान सुप्रीम कोर्टाच्या द्विसदस्यीय घटनापीठाचे सदस्य न्या. के. एम. जोसेफ आणि न्या. ऋषिकेश रॉय यांनी हायकोर्टाचा निकाल कायम ठेवलाय. यामुळे आमदार लता सोनवणे यांना मोठा झटका बसलाय.जातप्रमाणपत्रच अवैध ठरल्याने लता सोनवणे यांच्या आमदारकीवरच टांगती तलवार आहे.
जळगाव जिल्ह्यातील चोपडा विधानसभा मतदारसंघातून आमदार लता सोनवणे धनुष्यबाण या चिन्हावर अनुसूचित जमाती या प्रवर्गातून निवडून आल्या होत्या. त्यांच्या विरोधात महाविकास आघाडीमधील घटकपक्ष असलेल्या राष्ट्रवादी काँग्रेसचे माजी आमदार जगदीशचंद्र रमेश वळवी आणि अर्जुनसिंग दिवाणसिंग वसावे यांनी तक्रार दिली होती. आमदार लता सोनवणे यांचे टोकरे कोळी, अनुसूचित जमातीचे प्रमाणपत्र अवैध असल्याची तक्रार नंदुरबार येथील जातपडताळणी समितीकडे केली होती. समितीने जातप्रमाणपत्र अवैध ठरविले होते.
नंदुरबार जातपडताळणी समितीच्या निर्णयाविरोधात आमदार लता सोनवणे यांनी औरंगाबाद खंडपीठात याचिका दाखल केली होती. तेव्हा खंडपीठाने याबाबत चौकशी करून निर्णय घेण्याचे आदेश जातपडताळणी समितीला दिले होते. समितीने पूर्वीचा निर्णय दिल्याने आमदार सोनवणे पुन्हा खंडपीठात गेल्या होत्या. मात्र, खंडपीठाने त्यांची याचिका फेटाळून लावली होती. खंडपीठाने याचिका फेटाळल्यानतंर आमदार लता सोनवणे यांनी या निर्णयाला सुप्रीम कोर्टात आव्हान दिले होते. आता सुनावणीत आमदार लता सोनवणे यांचे टोकरे कोळी अनुसूचित जमातीचे प्रमाणपत्र अवैध ठरविण्याबाबतचा निर्णय कायम ठेवलाय. आता लता सोनावणे यांची आमदारकी रद्द झाली तर शिंदे गटाचे संख्याबळ एका सदस्याने कमी होणार आहे.