मुंबई पोलीस दल हे देशातील सर्वोत्तम पोलीस दल म्हणून ओळखले जाते. त्यांच्या कर्तव्यदक्षतेचा व्हिडीओ सध्या सोशल मीडियावर व्हायरल होतोय. मुंबईतील सहायक फौजदार विलास गुरव यांचा तो व्हिडिओ आहे. रुग्णवाहिका वाहतूक कोंडीत अडकल्याचा आवाज येताच त्यांनी जेवणाची सुट्टी असून देखील तत्परता दाखवली आणि रुग्णवाहिकेला वाट करुन दिली. हा व्हिडिओ श्याम गुप्ता यांनी ट्विटरवर पोस्ट करत पोलिसांचे आभार मानल्यानं विलास गुरव यांची कर्तव्यनिष्ठा सर्वांसमोर आली.
वर्दीचा राखून सन्मान, ठरला मुंबईचा अभिमान!
— Mumbai Traffic Police (@MTPHereToHelp) September 14, 2022
सहाय्यक फौजदार विलास गुरव यांनी काल वरळी नाका येथे अँब्युलन्सचा आवाज ऐकू येताच आपले कर्तव्य चोख बजावत मार्ग करून दिला. यामुळे अँब्युलन्सला रुग्णालयात वेळेवर पोहोचण्यास मदत झाली.
त्यांच्या या कामाला सलाम! #MumbaiFirst #KhakiSwag pic.twitter.com/ZrQEQIx9i4
वरळी नाक्यावर १३ सप्टेंबर रोजी ही घटना घडली आहे. त्यांची जेवणाची सुट्टी होती पण त्याचवेळी वाहतूक कोंडीत अडकलेल्या रुग्णवाहिकेचा आवाज त्यांनी ऐकला. जेवण बंद करुन ते रुग्णवाहिकेला वाट करुन देण्यासाठी धावले. त्यावेळी विलास गुरव यांच्या जोडीला नव्हतं. मदतीसाठी कोणीही नसल्यानं एकट्यानं कार्य पार पाडलं.
विलास गुरव यांनी रुग्णवाहिकेला मार्ग मिळावा म्हणून दोन सिग्नल बंद केले आणि वाहतूक कोंडीतून रुग्णवाहिकेला वाट करुन दिली. विलास गुरव यांच्या कर्तव्यनिष्ठेनं त्या रुग्णवाहिकेतील रुग्णाला वेळीच रुग्णालयात पोहोचता आलं. मुंबई वाहतूक पोलीस आणि मुंबई पोलीस आयुक्त यांच्याकडून देखील विलास गुरव यांचं अभिनंदन करण्यात आलं आहे.