दसरा मेळावा संपला तरी अजूनही राज्याच्या राजकारणात ठाकरे आणि शिंदे गटातील मेळाव्याच्या चर्चा सुरु आहेत. दरम्यान एक मोठी बातमी समोर आलेली आहे. पश्चिम रेल्वेत जाहिरातीसाठी जे टीव्ही लावले आहेत त्यावर शिंदेंचे भाषण दाखविण्यात आले. अशी गोष्ट करणं म्हणजे रेल्वेसोबत झालेल्या कराराचा भंग आहे आणि ही गोष्ट रेल्वेच्या लक्षात आलेली आहे.
दसरा मेळाव्याचे शिंदे गटाच्या वतीने जोरदार शक्तिप्रदर्शनही करण्यात आले होते. अशातच दसरा मेळाव्याचं एकनाथ शिंदे यांचं भाषण अचानक मुंबईच्या पश्चिम रेल्वे मार्गावरील लोकलमधील टीव्हीवर लाईव्ह दिसू लागलं. लोकलच्या जाहिरातीसाठींच्या टीव्हीवर राजकीय भाषण लाईव्ह कसं काय दिसू लागलं, यावरुन अनेक प्रवाशांनी आश्चर्य व्यक्त केलंय. दरम्यान सोशल मीडियावर यासंदर्भातील पोस्ट व्हायरल होत आहेत. काही प्रवाशांनी या प्रकाराचे ट्वीट करत पश्चिम रेल्वेला टॅग केलं आणि हा प्रकार योग्य आहे का, असा प्रश्न विचारला आहे. दरम्यान रेल्वेने कंत्राटदाराकडून खुलासा मागवला असून याप्रकरणी आता दंडात्मक कारवाईदेखील करण्यात येणार असल्याचं पश्चिम रेल्वेच्या वतीने सांगण्यात आलंय.
Mumbai local trains live telecast Maharashtra Chief Minister #EknathShinde political rally, WR stops it promptly says no permission was ever given, will seek explaination from LED TV contractor. #EknathShinde #MaharashtraPolitics
— Rajendra B. Aklekar (@rajtoday) October 6, 2022
Read here: pic.twitter.com/VJo3x1LaRY
शिवसेनेसोबत बंड केल्यानंतर शिंदे गटाचा पहिलाच दसरा मेळावा होता. त्यासाठी तगडं नियोजन करण्यात आलं होतं. जास्ती जास्त लोकांपर्यंत शिंदे गटाचा आवाज पोहोचण्यासाठी मोठी व्यवस्था करण्यात आली होती. त्याचाच एक भाग म्हणून शिंदे यांचे भाषण प. रेल्वेमधील जाहिरातीच्या टीव्हीवर लावण्यात आले असेल अशी चर्चा आहे. दरम्यान हा सगळा प्रकार गंभीर असून कंत्राटदारावर दंडात्मक कारवाई करण्याचे संकेत रेल्वेकडून मिळत आहेत. पश्चिम रेल्वेच्या लोकलमधून शिंदेंच्या भाषणाचे थेट प्रक्षेपण करण्यात आले होते. आता. आता रेल्वे प्रशासनाने कंत्राटदाराकडून स्पष्टीकरण मागवलं असून पुढे काय कारवाई होते ते समजेलच.