Volodymyr Zelenskyy Vs Donald Trump
अमेरिकेचे माजी राष्ट्राध्यक्ष Donald Trump आणि युक्रेनचे विद्यमान राष्ट्राध्यक्ष Volodymyr Zelenskyy यांच्यातील वादाने संपूर्ण जगाचे लक्ष वेधले आहे. व्हाईट हाऊसमध्ये झालेल्या या वादामुळे अमेरिका-युक्रेन संबंधांवर प्रश्नचिन्ह निर्माण झाले आहे. या वादानंतर संपूर्ण युरोप युक्रेनच्या समर्थनार्थ एकवटला असून कॅनडासह अनेक देशांनी झेलेन्स्की यांना पाठिंबा दिला आहे.
व्हाईट हाऊसमधील खडाजंगी
झेलेन्स्की यांनी अमेरिकेकडून मिळणाऱ्या मदतीवर समाधान व्यक्त करण्याऐवजी थेट ट्रम्प यांच्याशी वाद घातला. ट्रम्प यांनी झेलेन्स्की यांना उद्देशून स्पष्ट केले की, “तुम्ही अमेरिकन मदतीबद्दल कृतज्ञ नाहीत. तुम्ही कोणत्याही कराराच्या स्थितीत नाही आणि तिसऱ्या महायुद्धाच्या शक्यतेने जुगार खेळत आहात.” या तीव्र शब्दांमुळे दोन्ही नेत्यांमध्ये वाद उफाळला.
उपराष्ट्राध्यक्ष जेडी वान्स यांनी देखील झेलेन्स्की यांच्यावर टीका करत म्हटले की, “ओव्हल ऑफिसमध्ये येऊन मीडियासमोर आपले म्हणणे मांडणे आणि दबाव टाकण्याचा प्रयत्न करणे हा अपमान आहे.” त्यावर झेलेन्स्की यांनी उत्तर देत विचारले, “तुम्ही युक्रेनला तेथील समस्या पाहण्यासाठी गेला आहात का? या युद्धाचा परिणाम अमेरिकेवरही होईल.“
झेलेन्स्की यांचा रोखठोक इशारा
झेलेन्स्की यांनी ट्रम्प यांच्या भूमिकेवर नाराजी व्यक्त करत म्हटले, “आम्हाला काय वाटले पाहिजे ते आम्हाला सांगू नका. आम्ही आमच्या लोकांच्या सुरक्षिततेसाठी लढत आहोत. रशिया आमच्यासाठी खुनी आहे.”
वादानंतर झेलेन्स्की यांनी व्हाईट हाऊस सोडले आणि कोणत्याही खनिज करारावर स्वाक्षरी करण्यास नकार दिला. यामुळे ट्रम्प प्रशासनाने या कराराच्या पुनरुज्जीवनाबाबत अनिच्छा दर्शवली.
युरोप आणि इतर देशांचा युक्रेनला पाठिंबा
या वादानंतर युरोपियन युनियन, कॅनडा, फ्रान्स, जर्मनी, स्पेन आणि पोलंड यांनी झेलेन्स्की यांच्या बाजूने उभे राहण्याचा निर्णय घेतला.
- फ्रान्सचे अध्यक्ष इमॅन्युएल मॅक्रॉन म्हणाले, “रशिया आक्रमक आहे आणि युक्रेन हे बळी राष्ट्र आहे. युक्रेन आपल्या प्रतिष्ठेसाठी, स्वातंत्र्यासाठी आणि युरोपसाठी लढत आहे.”
- जर्मन चान्सलर ओलाफ स्कोल्झ यांनी युक्रेनला विश्वास देत म्हटले की, “युक्रेन जर्मनी आणि युरोपवर विश्वास ठेऊ शकतो.”
- युरोपियन कमिशनच्या अध्यक्षा उर्सुला वॉन डर लेन यांनी झेलेन्स्की यांना पाठिंबा देत म्हटले, “तुम्ही कधीही एकटे नाही. आम्ही न्याय्य आणि शाश्वत शांततेसाठी तुमच्यासोबत काम करत राहू.”
राजकीय पडसाद आणि भविष्यातील परिणाम
ट्रम्प यांच्या भूमिकेवर अमेरिकन सिनेट आणि काँग्रेसमध्येही तीव्र प्रतिक्रिया उमटल्या.
- सिनेट अल्पसंख्याक नेते चक शूमर यांनी ट्रम्प यांच्यावर टीका करत म्हटले, “ट्रम्प यांनी पुतिन यांचे काम सोपे केले आहे.”
- रिपब्लिकन सिनेटर लिंडसे ग्राहम यांनी या भेटीला “पूर्ण आपत्ती” म्हटले.
दरम्यान, मार्को रुबियो यांनी झेलेन्स्की यांना माफी मागण्याचे आवाहन केले, तर झेलेन्स्की यांनी स्पष्ट शब्दांत सांगितले की, “युद्ध थांबवण्याचा निर्णय फक्त युक्रेनच्या जनतेच्या इच्छेनुसार होईल.”
